Млеко од нашата фарма :: Домато.mk :: Онлајн гурмански маркет за добра храна и фино живеење

Млеко од нашата фарма

29 февруари, 2016 година е еден од најважните денови за оваа фарма, тоа е денот кога е направена нивната прва достава на млеко. Целата приказна започнува со едно „невино“ отворање на фејсбук-страница, преку која сакаат да го почувствуваат пулсот на заедницата и што таа мисли за оваа идеја. По сите позитивни реакции кои ги добиваат, тие се решаваат на еден посериозен чекор – основање на компанијата. Инаку инспирацијата за „Млеко од нашата фарма“ датира уште од младоста на сопствениците, пред триесеттина години, кога во нашата земја секој можеше да добие свежо измолзено млеко пред својот дом. Токму ова е и идејата на „Млеко од нашата фарма“, да создаваат природни и здрави производи, кои ќе бидат достапни за сите потрошувачи. Едноставно да се вратиме во времето кога сѐ што јадевме и пиевме беше здраво и без додатоци или како тие што милуваат да кажат „единствената главна состојка во нашите производи е нашето вистинско млеко“.